Acts 20

Paulo i lau Ierusalema eai: (1) i lau Makedonia eai eo tupo Heleni eai.

1Se hetalagegagega lautom Paulo tauawaabiena i eogaidima, i alagoiedi, i lauaioniedi, abo i laugabaedi i lau Makedonia eai. 2Ie lau nei tupo gamagamagari ne aridi eai, i ribahenuapaipaidaoiedi, abo i lage Heleni eai. 3Nawalai haiona nei eai maedi se mia. Ia bena i geru i lau Suria, Iudea tataodi headi se oiriba se wesei, arinai abo i uio Makedonia dobilana i lauwatai. 4Headi ia se hesaguei maenayao se lau Asia eai, Sopata, Piru natuna, Berea tauna; eo Tesalonia tataodi headi hinage, Aritako eo Sekuna: eo Gaio, Derebe tauna, eo Timoteo; Tukiko eo Teropimo, Asia tataodi hinage. 5Isi se bagunaimai, Toroa eai se bagibagiemai.

6Areto‐Nige‐i‐Sese mataasi huiadi se lautom, abo Pilipi ai gerugabaei; asubena haligigi abo ai duna Toroa eai isi aridi eai, hinage asubena haligigilabui nei eai aie mia. 7Sabati asubenana bagubagunana eai, tauataataiena se oigogo, areto se ihi, Paulo i guguianonohaidi, mara‐ie‐tom bena abo i laugabaedi; ena riba i heloha, i lau e bulinuana eai. 8Lamepa gamagaridi si healasidi ema aba‐oigogo eai, biri pota eai. 9Hewari esau, esana ede Eutuko tomlapai eai i babawa, i eno mate. Paulo ma guguialohalohana, arinai abo hewari wa matana se enoeno ariri, numa isi haiona i beuhemuridi, tano eai ia se abi’sini, i mateo. 10Paulo abo i pesadobi, i salaoba dobi, i labaisiniama, i ene, “Tabu nuamiu se baaea, ena mauri ma otana tuiatuiana eai.” 11Ia abo i awaseuio, eo areto ie ihi, se aiai eo riba, i riba heloha i lau e mara‐ie‐tom, arinai abo i laugabaedi. 12Hewari wa se woeaiama i mauri uio, eo nuadi abo se taru komakomani.

(3) Toroa i laugabaei i lau Mileto eai.

13Ai aie geru baguna waga eai, ai lau Aso eai, arinai abo Paulo ai bagibagiei doha i hetaladuimai, ia i henua i lauyona. 14Ia maidamai ai hailobai Aso eai ia abo ai usai, abo aie duna Mitelene eai. 15Arinai hinage ai ue uio, mara‐ie‐tom ai lage Kaiosi ubuna eai; asubena esau Samo eai aie duna, imaisina Mileto eai aie duna. 16Paulo ena nuatu adidiri i ene, taba nige i pesa Epeso eai, nige bena i bawa Asia eai, bena i lau heuheula Ierusalema eai i lage Penetekoso asubenana eai.

(4) Paulo maena Epeso babadadi.

17Mileto eai tatao headi i hetamaridi se lau Epeso ekalesia tauitawataidi se eogaidima. 18Abo se laoma ia arinai, i ribalau isi aridi eai i ene: “Egu laulau alodaina ede huia gamagamagari omi au itayao, lahinae Asia eai ea lage bagubaguna wa arimiu eai, i laoma e huia ta. 19Eau Guiau ea heaeaiei ma nuabigabigagu eo ma matasulugu hinage, eo noho gamagamagari hinage ea hearodi Iudea tataodi se wesewesegu: 20aba helolomiu nige ginaurina esau ea mahihiei, na nuamiu ea hemasarahadi, eo ea heatamasamasarahaimiu, eo hari numa, hari numa eai, 21Iudea tataodi eo Heleni tataodi hinage ea guguiaidi, bena nuadi abo se buidi Eaubada arinai, eo Guiau Iesu Keriso abo se sunusunumaei. 22Wau ta abo ea lau Ierusalema eai, earua nuagu i auaui, saha eo saha nei eai abo ea hearodi nige ea nuatuidi; 23teina mo, eanua gamagamagari eai Earua Tabuna i heribagu, edi aba auaugu, eo agu amamna se abinonohaiyao. 24Teina ginauridi ta taba nige esau i hemoimoiugu, maurigu hinage taba nige ea nuatui, agu paisoa mo ta taba ea abiheohi ma nualologu, hewau ta Guiau Iesu i leama, Eaubada ena ainauia, wasa lolona, bena ea wasaduaiei. 25Na ea nuatuiyao, omi gamagarimiu arimiu eai Eaubada ena basileia ribana ea guguiaimiu, matagu taba nige au itauioi. 26Paana ede meta wau asubena ta arinai ea heribamiu me, tatao gamagamagari osinadi giruna eau arigu eai nige’e, 27paana ede Eaubada ena riba gamagamagari se ohi ea heribamiuo, nige ea ma’e’e. 28Omi, omibom nanabumiu au nanabu, eo mamoe gamagamagari eawoidi hinage, Earua Tabuna i hetoromiu, isi tauwoeaidi ede omi, Eaubada ena ekalesia iabom osinana eai i unedio, au heaheaidi. 29Eau ea itayao, ea laugabaemiu, na kedewa‐luko abo se luimiu, eawoidi abo se hetatagorigoridi. 30Headi hinage omi arimiu eai abo se toro, se ribahilihilimiu, bena tauataataiena se niuridi aridi‐ena. 31Arinai au soasoari, na au nuanuatui, borimai‐haiona arinai ea ribahesanapumiu, maiona to asubena nige ea ribalautom, ma matasulugu hinage. 32Omi wau ta abo ea heabimosemiu Eaubada arinai, eo ena ainauia ribana arinai hinage, ia ena adidiri eai abo i abihetoromiu, ena ainauia i leawa enamiu, tauhetabu gamagamagari maediyao. 33Tau esau ena silver eo, ena gold eo, ena lulu hinage, nuagu nige se lauedi. 34Omi au itayao, nimagu eai ta ea paipaisoa, agu aiai eo egu ginauri gamagamagari ea lobaidi, agu sasaguyao adi hinage. 35Ginauri gamagamagari ea heitamiuo, ea ene au paisoa tatao beruberu abo au labaidi, eo Guiau Iesu ena riba hinage abo au nuatuidi, ia i ene ina doha, ‘Ta ainauiai i lolo ariri, se ainauiaida lolona nige doha.’”

36Ia abo i ribalautom i turibono, maedi se lauuura. 37Isi gamagaridi se dou ariariri, se durudurulau Paulo gedugeduna eai, ia se alagoiei. 38Edi nuadubuena paana ede wau riba wa i ribaei i ene ia matana taba nige se itauioi. Isi dobila eai ia se hesaguei, i lau e waga eai.